quotes of books nermeen youssef
Nermeen Youssef
Description not available.
هناك رحلات في حياة الإنسان منها من يمر بلحظات سعيدة فقط، ومنها من يكون نقطة فاصلة في حياته وتغير مجرى حياته ، فالقدر كثيرا ما يخبئ في طياته مفاجئات للإنسان خلال حياته ، قامت كارما ووالدتها برحلة إلى مدينة شرم الشيخ ، والقدركان ينتظرهما ...
Fayrouz Mahmoud
هدأ قلب إيمان هدوء هبوط الطائرة على أرض المطار وغلق جميع محركاتها، فقد كانت نبضاتها سريعة وعالية كصوت إقلاع الطائرات، بل أكثر من ذلك كصوت إنطلاق الصاروخ في الفضاء ، شعرت بطمأنينة وهدوء وسعادة ومجموعة مشاعر مختلفة في ذات الوقت، كل أفكارها السوداء تبخرت في لحظة ، عثت على ما كانت تبحث عنه دون مجهود منها وجدت وليفتها وأمها اللاتي حُرمت منهما منذ الصغر، كما اطمأنت بعدم وجود نية لياسين أن يتزوجها.
mahmoud said
كارما : الشركة قبلتني أنا كمان الحمد لله
خالد : تمام أوي الحمد لله
كارما : بس غريبة قبلونا واحنا طلبة ؟! أنا من كتر الخريجين اللي كانوا في الانترفيو قلت مش هانتقبل .
خالد : يا بنتي الشركات واقعة ومش لاقين مرتبات يدفعوها ، لقوا الطلبة عايزين خبرة وهما عايزين شغل من غير ما يدفعوا مرتب كبير ، المصلحة متبادلة بياخدوا من دة على دة عشان ميكلفهمش كتير
كارما : فعلا معاك حق يا خالد .
خالد :حد اتصل بيك ياأحمد من الشركة ؟
أحمد : أه كلموني امبارح بس مش عارف مش مشجع الموضوع .
كارما : ليه يابني انت مش كنت موافق وجيت معانا .
أحمد : أنا جيت معاكوا بس مش عارف ان الموضوع جد ، كنت واخده تسلية ورايح معاكوا For fun لكن شكله كدة هايشغل وقتنا وهاتقيد مواعيد عمل ومذاكرة ومشروع تخرج كدة كتير ياجماعة
كارما : أنت سمعت كلام أميرة ومي ولا ايه ؟
أحمد : لا والله بس حاسس ان اليوم كدة ادمر ما بين جامعة وشغل ومشروع
خالد : وأنت وراك ايه غير كدة ؟
أحمد : وراك ايه ؟! ورايا مزز عايز اخرج معاهم اتفسح أو حتى انتخ انا لسة شاب يا جدعان عايز أعيش شبابي .
كارما : يعني لو متعبناش في شبابنا هانتعب أمتى لما نعجز ، مش نتعب دلوقتي عشان نلاقي حياتنا مريحة لما نكبر .
خالد : ياسيدي على العقل دماغك حلوة يا كارما وبتعجبني بس تمشي على دماغ ولد مش بنت
كارما : يا سلاااام .. اشمعنى بقأة ؟
خالد : الولد بيعمل كدة عشان لازم يشتغل ويكون له career ويبني نفسه ويعيش مرتاح ويعرف يفتح بيت لكن كبنت ....
كارما : كبنت ايه ؟ انت فكرك ان في راجل النهاردة بيفتح بيت لوحده في الزمن دة ؟!
خالد : اه فيه ودة المفروض يحصل .
كارما : بص يا خالد البنت لو اعتمدت على الراجل تبقأة غلطانة هو مش معاه مصباح علاء الدين وأنا بصراحة عايزة أعيش مرتاحة ، أنا الحمد لله عيشت من صغري مرتاحة وماما ربنا يخليهالي موفرالي كل حاجة ، بس الطموح بيجيب طموح ، والخيبة بتجيب خيبة .
خالد : بس الراجل هو اللي عليه يشقى .
كارما : ما يشقى هو أنا منعته ؟! بس أنا كمان من حقي آمن نفسي من يوم غدر من يوم اتقلب مزاجه .. مش عايزة يجي يوم عليه اكون نفسي اطلق منه واسيبه واضطر اقعد معاه عشان بيصرف عليا وعلى عيالي .
خالد : متزعليش مني يا كارما انت بتكلمي كدة عشان تجربة مامتك
كارما : تجربة ماما معقدتنيش بالعكس دي فوقتني بدري على واقع وحقيقة ومش ماما بس اللي حالتها كدة دة نص ستات مصر بالوضع دة
أحمد : هههههههههه هو انتي بتحضري اجتماعات المجلس القومي للمرأة هههههههه .
كارما : ههههههه من غير اجتماعات، بص للناس وتجاربهم حواليك هاتعرف الحقيقة ، وبعدين أنا عايزة يكون ليا شخصيتي وكاريري مش عشان بس لو اللي حبيته واتجوزته طلع وحش اقدر انفصل عنه ، لأ ، حتى لو احنا الاتنين متفاهمين وبنحب بعض أنا حاجة وهو حاجة .
خالد : بس اللي بيحبوا بعض لازم يكونوا حاجة واحدة .
كارما : حاجة واحدة في الشدة والازمات ، ويكونوا الاتنين مش مقصرين في حق بعض ، مش طرف متعود ياخد ع طول ومايديش ، لازم كل واحد يكون عارف حقوقه وواجباته ويكملوا بعض مش واحد بيدي بدون مقابل والتاني عمال ياخد، وبلط وسايق فيها، هاتيجي لحظة على اللي بيدي دة مش هايلاقي حاجة يديها واللي اتعود ياخد ساعتها مش هايقدر ولا هايفهم .
ينظر خالد لكارما أثناء حديثها بإعجاب شديد
أحمد : معاكي حق .. بس الراجل مابيحبش النوع دة من الستات .
كارما : مايحبش .. أنا مش بعمل كدة عشان يحبني المفروض يحبني زي ما أنا بمعتقداتي وافكاري .
خالد : أنت يا أحمد بتكلم على أي نوع من الستات ؟
أحمد : أقصد المستقوية
كارما : مستقوية ؟! هو أنا لما يبقأة ليا كارير ومستقلة ابقأة مستقوية ؟!
أحمد : الست المستقلة مادياً مستقوية .
كارما : هي مش مستقوية بدليل ستات كتير مقتدرين مادياً وعايشين مع ازواجهم عشان بيحبوهم ومتفاهمين
أحمد : بس ساعة الخلاف خيار الانفصال هايبقأة أقرب لدماغها طالما تقدر تستغنى عنه
كارما : وأنت كراجل ترضى تعيش مع واحدة مستمرة معاك بس عشان بتصرف عليها مش عشان بتحبك .
أحمد ( ضاحكا ) : هههههه بتستفزي رجولتي يعني ههههههه
خالد : افهم من كلامك يا كارما انك مستعدة تبتدي من الصفر مع اللي بتحبيه ؟
Nermin Yousif
إنتاب إيمان القلق كثيراً من هذه المكالمة ، وخشيت ان يُحدثها يس في مسألة ارتباطهما كما يريد والدها كرم وعمتها نور، وقالت لنفسها كنت أرغب في ذلك قبل أن أقابل أحمد واحبه، فياسين كان بالنسبة لي الولد الوحيد الذي أعرفه،أما الآن فأنا لا أرى أي رجل في الدنيا سوى أحمد . وحملت إيمان هم هذه المقابلة جدا، وحاولت مرة أخرى الاتصال بأحمد ولكنها تجد هاتفه مغلق كالعادة.
أما نور العمة، لم تكذب خبراً وقامت بالإتصال بأخوها كرم لتبشره بميل قلب يس إلى إيمان فاتصلت به في نفس الليلة .
كرم : خير يا نور .. بتتصلي في وقت متأخر كدة ليه ؟
نور : لا ياحبيبي متقلقش أنا بخير .
كرم : أمال في ايه ؟
نور : أنا اتصلت بيك عشان اقولك ان يس رجع من شرم الشيخ.
كرم : طب ياستي حمد الله على سلامته .
نور : أنا سمعته من شوية بيكلم ايمان على الموبايل .
كرم : ايه !! ليه ؟
نور : اهدى ابوس ايدك أنا ماصدقت الواد قلبه اتفتح لايمان وكلمها .
كرم : وكان عايز منها ايه بقأة ؟
نور : بكرة يس هايجي يستأذنك يخرج مع ايمان ورحمة أبوك توافق خليهم يقربوا من بعض ونفرح بيهم بقأة .
كرم : طب مايكلموا في البيت ادامنا هو لازم يخرجوا ؟
نور : والنبي ياكرم مش وقت تحبيكاتك دي ، وافق عشان خاطري .
كرم : حاضر يا ستي لما يجي بكرة يحلها حلال .
اشرقت شمس الصباح بعد عدة نوبات قليلة من النوم لإيمان، ينتابها شعور بالقلق والخوف وقلبها ينبض بشكل سريع لم تعتاده من قبل، تحاول تهدئة نفسها ولكن صوت نبضات قلبها يكاد يسبب لها صداع مزمن، واصبحت غير قادرة على السيطرة على قلقها وخوفها ، واندفعت جميع الأفكار لذهنها اندفاع كرة البولينج على الزجاجات، هل سبب قلقها ابتعاد أحمد عنها وعدم رده عليها؟ أم خوفها من ان يتقدم لها يس وهي اصبحت تعشق أحمد ولا تستطيع العيش بدونه وهي متيقنة ان والدها سيوافق على يس حتى بدون أن يعرف رأيها لأنه يخطط لذلك منذ زمن، أم قلقة من أمر غيبي لا تعرفه؟ وانتظرت يس أن يأتي لمنزلها كما اتفقوا في مكالمتهما ليلاً، وجعلت تطمئن نفسها بأن والدها لن يوافق على خروجهما سوياً ، ولكن حدث ما لم تتوقعه ووافق كرم على خروجهما كما وصته أخته نورولكن بشرط عودتهما الساعة السادسة، مما زاد من قلق إيمان، واصبحت شبه متيقنة ان هذا الأمر مُرتب ترتيب عائلي، أو ان هذه العائلة تدبر لأمر ما على غير رغبتها، وبالفعل خرجت مع يس وجلسا على كافيه على النيل، وحاولت أن تداري قلقها وخوفها وتظهر بإنها طبيعية، وتحاول الضحك للسيطرة على قلقها .
تدخل كارما على والدتها في غرفة الفندق وتجدها جالسة تقرأ في البلكونة
كارما : ايه يا ماما أنت هاتفضلي قاعدة في البلكونة هنا .
ابتسام : أنا مستنياكي يا حبيبتي .
كارما : طب يالا نخرج يالا نشوف program النهاردة ايه ؟
ابتسام : مالك يا حبيبتي ؟
تنظر كارما إلى والدتها نظرة طويلة تحبس فيها كارما دموعها ثم تنفجر في البكاء في حضن والدتها ، تنزعج والدتها وتأخذها في حضنها وتسألها :
ابتسام : حبيبتي مالك ؟ ايه اللي حصل ؟
كارما : أنا بعيط ليه؟ أنا قوية أنا بعيط ليه ؟ أنا واخدة قراري .
ابتسام : الأقوياء بردوه بيعيطوا عادي ياحبيبتي ، لو مش عايزة تحكي حاجة دلوقتي براحتك
كارما : لأ هحكيلك يا ماما عشان ارتاح ، باختصار خالد طلب يخطبني ويسافر يكون نفسه وأنا رفضت
ابتسام : وأسباب رفضك ايه ؟
كارما : مش مهم الأسباب دلوقتي ، المهم اني مقتنعة جدا باسباب قراري بس ليه مخنوقة وبعيط .
ابتسام : يبقأة بتحبيه يا كارما وعايزاه، والمعركة دلوقتي بين عقلك وقلبك .
كارما : وأنت رأيك ايه يا ماما ؟
ابتسام : أنت عارفة يا كارما ان أنا دايما برجح العقل .
كارما : طب نعمل ايه عشان نوازن بين العقل والقلب وميبقاش في معركة بينهم ؟
ابتسام ( تنهيدة طويلة ) : اااااااه سؤال صعب يا بنتي ومحدش هايعرف يجاوب عليه ، قومي فرفشي واغسلي وشك وتعالي ننزل نروح أي حتة مش احنا جايين نتفسح ، كله بيعدي ياحبيبتي ، كل حاجة في اولها صعبة بس كله بيعدي .
تنهض كارما وتذهب للحمام تاركة موبايلها على الترابيزة فتأخذه ابتسام وتتصل بخالد
تخرج كارما وإيمان ليلاً ليسيرا معا على البحر ، محاولة من كارما لدعم أختها وإخراجها من حالتها النفسية السيئة، فكانت كارما كالجراح الذي فتح جرحاً لإستئصال المرض وإزالته نهائياً.
كارما: ايه رأيك في الجو والبحر؟
ايمان: تحفة هااااا عايزة اتنفس نفس جامد وعايزة أصرخ بصوت عالي
كارما: ممكن اسألك سؤال؟
ايمان: اه طبعاً
كارما: أنتِ كنتِ جاية مع أحمد تعملي ايه؟
ايمان: كنت مخنوقة وأنتِ عارفة بابا ، قلت اتفسح واغير جو.
كارما: وأنتِ متتفسحيش وتفيري جو غير مع شاب في شرم الشيخ من ورا أهلك؟!
ايمان: هو الوحيد اللي بيسمعلي ويفسحني.
كارما: أنا مش معترضة انك تحبي أحمد، أنا معترضة انك تيجي معاه من القاهرة لشرم الشيخ وتنزلوا في أوتيل ، تعرفي أنه كلمني عشان احجزله الغرف ولما فهمت أنه جايب واحدة معاه - طبعاً معرفش إنها أنتِ ـ رفضت اعمله حاجة وراح هو اتصل بالريسبشن وحجز .
ايمان: قصدك ايه؟
كارما: قصدي إن أحمد مكنش يقصد فسح وخروج بس .. أحمد كان ناوي على حاجة تانية.
ايمان: قصدك ايه؟
كارما: ايه يا ايمان، أنتِ هاتقضيها قصدك ايه؟ قصدك ايه؟ ايه يعني مش فاهمة؟!
ايمان: كارما ، أحمد كان حاجز لي أوصة وهو أوضة ، لو كان ناوي على حاجة تانية كان هايكلف نفسه أوضة تانية ليه؟
كارما: مش معقول!! أنتِ عبيطة للدرجة دي!! أولاً مش هايجبهالك على بلاطة أوي كدة لأنه متوقع إنك ترفضي لازم يجبهالك واحدة واحدة، ثانياً مافيش أوتيل هايسمحله ينزل مع واحدة في غرفة واحدة بدون صلة قرابة بينهم.
ايمان: بصراحة أحمد من ساعة ما عرفته ماطلبش مني حاجة غلط، واتفسحنا كتير قبل كدة ومعملش معايا أي حاجة برة حدود الأدب ، كان كل خروجتنا كلام وهزار ولعب.
كارما: كان بيوقعك الأول ، أنا عارفاه من ٦ سنين وشوفت علاقاته الكتير ، أنتِ مش أول ولا أخر واحدة يا إيمان.
ايمان: أنا كنت هارفض لو طلب مني أي حاجة غلط.
كارما: كان هايبررهالك وهاتسمعي كلامه، اللي يقنعك تيجي معاه لحد هنا وتقضي كام يوم مع بعض هايقنعك تعملي أي حاجة.. من الآخر اللي يقبل مقدمات غلط بتوقع نهايات غلط.
Nervana Mahmoud
اعتكفت إيمان في غرفتها وعاشت مع رسم لوحاتها وتدخين السجائر التي نفست بها عن همها وحدها القليل في الدنيا ، ظلت تمر بمرارة اليأس وشربت من كأس الحرمان .. الحرمان من الأم والأخت للمرة الثانية والحرمان من الحبيب الذي أختفى بدون أسباب واضحة لها ، والحرمان من حنان وتفاهم الأب ، والحرمان من ابن العمة الذي انجذب لأختها وهو كان لا يطيق الجلوس ٥ دقائق في بيت خاله، والحرمان من الصديقة الوحيدة فاتن والتي لم تجد منها سوى النصح والإرشاد المنفى مثل نصائح أبيها، لم تشعر بقرب أحد منها، فلجئت للوحدة مع رسومات تعبر عما بداخلها.
وهكذا ندور في فلك الأيام التي تشبه أرجوحة الصاروخ، يظل العاملون عليها في تحضيرها ونحن ننتظر إنطلاقها ويتسلل الملل إلينا من طول الإنتظار حتى يسرح من يسرح ويحلم من يحلم ويصبح كل من في وادي يلهيه، هذا يريد أن يصبح كبيراً ويعمل بالهندسة، وهذا يريد أن يصبح رجل أعمال ولديه ثروة ، وهذه تحلم بأن تصبح بطلة سباحة عالمية، وهذه تحلم باليوم الذي يجمعها بحبيبها وتعيش معه في سعادة. وفجأة تنطلق الأرجوحة وتعلو الصرخات وتزداد ضربات القلب ويعلو الأدرينالين في الدم، وتسقط الأحلام من رؤوس أصحابها،ويستعيدون وعيهم، أحدهم يتمنى العودة ، وآخر يستمتع بالارجوحة ويسلم عقله لمتعة الطريق وينسج أحلامه في رسومات السحاب حتى تتوقف الأرجوحة ويهبط على الأرض فجأة ويدرك حقيقة عدم وصوله لأحلامه وأن هذا كان مجرد حلم، فكلاهما خاسران الذي صرخ من أجل العودة حيث رتابة الحياة الحقيقية، والذي استسلم لأحلامه في السماء واستيقظ على صوت ارتطام أحلامه بالواقع كصوت ارتطام الأرجوحة على الأرض. ولكن هل يستويان؟! الإجابة . لا.. هناك من يستسلم مع أول ارتطام وهناك آخر إستثنائي يصمم على تنفيذ ما رسمه على السحاب على أرض الواقع. فمن أنت من بينهما؟ المستسلم أم الإستثنائي؟
souzan shady
( تصل كارما ووالدتها إلى شقتهما بالقاهرة بعد رحلة شرم الشيخ التي حولت حياتهما رأساً على عقبٍ، أحياناً ما يحتاج الإنسان إلى رحلة تغير مجرى حياته، بل كثيراً منا يقوم برحلة بغرض أن يتوقع شيئاً جميلاً قد يحدث بعيداً عن ملل ورتابة الحياة، ولكن بما إننا في الدنيا وليس في عالم الخيال ، وعادة تأتي الرياح بما لا تشتهي السفن ، فرحلاتنا عادة ماتنتهي ونعود إلى ما كنا عليه أو نعود بخيبة أمل حيث ما توقعناه لم يحدث في الحقيقة . ولكن هذه الرحلة غيرت مجرى حياة كارما على المستوى المهني والعائلي.
