Ramy Romana

Ramy Romana 29 Apr 2025

هلأ خلصت الرواية وبصراحة فكرة إنه النجوم شخصيات زينا، بعيشوا وبتوجعوا وبحبوا وبكرهوا، إشي جديد وغريب. بسرعة بتلاقي حالك مهتم بمصيرهم، خصوصا المشاكل والعلاقات اللي بينهم، زي نجمة واحد وثلاثة، وهديك العلاقة بين ستة وثلاثة عشر... بتحسهم حقيقيين. والجو العام على الكوكب كان إشي ثاني، غامض وموتر.

بس برضو عشان أكون صريح، فيه محلات حسيت الأحداث صارت تمشي شوي شوي، يمكن التفاصيل كانت زيادة أو الحكي فلسفي شوي. والنهاية... جابتلي جلطة! يعني مؤثرة وبتصدم فش بعد هيك كلام، نهاية الشخصيات وسر اثنين الغريب، بس يا أخي تركتني معلّق بالهوا وعندى مليون سؤال! هو تشويق ماشي، بس الواحد بنقهر شوي لما تخلص القصة هيك وكل الأسرار المهمة بعدها بالهوا ومش مفهومة.

بالآخر يعني، رواية مش أي كلام، بتوجّع القلب وبتخلّيك تفكر بمعنى كل إشي حواليك، عن الحياة والموت والنجوم والبشر والحرب، شغل قوي ومختلف عن اللي بنقرأه عادة. وأكيد خلّتني بدي أقرأ الجزء الثاني، عشان أعرف شو صار بالأربعة اللي ضلوا وشو قصة الشمس هاي وسرّ اثنين! قصة عنجد بتضل تفكر فيها.