العربية  

books كل ده فيا

If you do not find what you're looking for, you can use more accurate words.

View more

كل ده فيا (Book)


كل ده فيّا

حكاية بنت عندها أحلام كتير، وقلب شايل ناس كتير

مقدمة: أنا مين؟

أنا مجرد بنوتة عندها أحلام وأهداف كتير، نفسها تحققها كلها، ولسه عندها أمل إنها تحقق حلم من أحلامها على الأقل.

بنوتة بسيطة، متواضعة، وطيبة بزيادة، لدرجة إن فيه ناس ممكن تستغل طيبتها أو تضحك عليها. الناس شايفاني هادية جدًا، وده حقيقي، بس الهدوء مش كل شخصيتي. أنا كمان مرحة، بحب الحياة، وبحب المغامرات، وبحب صحابي جدًا، ونفسي أشوفهم بيحققوا كل حاجة نفسهم فيها، حتى لو حققوها قبلي.

بحب الناس اللي في حياتي، وبخاف عليهم، وبفرح لفرحتهم، ويمكن ساعات ببقى مشغولة بأحلامهم زي ما أنا مشغولة بأحلامي.

نفسي أوصل لحاجة حلوة في حياتي، حاجة تفرحني وتخليني فخورة بنفسي، وتخلّي أهلي وصحابي فخورين بيا. ونفسي في المستقبل أبقى إنسانة أولادي يفتخروا بيها.

أكتر حاجة بتخوفني إني أفضل أحاول وفي الآخر موصلش للي نفسي فيه، وأفضل مكاني من غير ما أحقق حاجة من اللي بحلم بيها. بس رغم خوفي، أنا مؤمنة إن ربنا بيختار لنا الخير، حتى لو الخير ده جه عكس اللي كنا بنتمناه. ممكن أزعل وأعيط في البداية، لكن في الآخر هحاول أرضى بنصيبي وأكمل.

دي أنا، أو على الأقل دي أجزاء مني. ولسه فيه حاجات كتير جوايا يمكن محدش يعرفها، ويمكن أنا نفسي لسه بحاول أفهمها.

الفصل الأول: منّة الهادية

زمان، وأنا صغيرة، كنت هادية جدًا. هادية لدرجة إن الناس كانوا بينادوني «منّة الهادية»، وفيه ناس كانت فاكراني مش بتكلم أصلًا من كتر ما كنت بسكت.

مكنتش بعرف أتعرف على حد بسهولة، ولا أبدأ كلام مع حد، ولا حتى آخد الخطوة الأولى عشان أصاحب حد.

كنت بخاف أصاحب الناس أو أكلمهم، ومكنش عندي طاقة اجتماعية خالص. التعامل مع الناس وتكوين الصداقات مكنش حاجة سهلة بالنسبالي، وكنت مش بعرف أعمل ده.

كبرت وأنا متعودة على الهدوء والوحدة، ودي كانت شخصيتي اللي الناس عرفوها عني. محدش كان يتخيل إن البنت الهادية دي جواها روح مرحة، بتحب الحياة والمغامرات، وإن شخصيتها هتتغير مع الوقت.

لكن التغيير ده محصلش لوحده، ولا أنا اللي أخدت الخطوة الأولى.

هما اللي جم لعندي.

الفصل الثاني: ماما هي الحياة

فيه ناس كتير بحبهم في حياتي، لكن فيه شخص بالنسبالي مش مجرد شخص، ده الحياة نفسها.

ماما.

ماما هي الحياة، ماما كل حاجة في حياتي حرفيًا.

بابا توفّى وأنا عندي أربع سنين. كنت لسه طفلة صغيرة، وكان نفسي يكون موجود معانا وأنا بكبر، وأعيش معاه ذكريات أكتر، لكن هو في حتة أحسن دلوقتي.

كبرت وماما كانت أهم شخص في حياتي. هي أقرب واحدة ليا، وبحكيلها كل حاجة، ومهما كان عندي ناس كتير بحبهم، مكانتها عندي مختلفة.

ماما دايمًا عايزاني أحسن الناس، ونفسها تشوفني في أحسن حال، وأحقق أحلامي وأوصل للمكان اللي بتمناه. حبها ليا كبير لدرجة إني بحس إنها لو تقدر تجيبلي نجمة من السما، هتجيبهالي.

وفيه حاجة في ماما عمري ما عرفت أفهمها: إزاي بتعرف إني زعلانة؟

هي الوحيدة اللي بتعرف إن فيا حاجة، وإن فيه حاجة مضايقاني، حتى لو أنا مخبية ومش بتكلم. معرفش إزاي بتعرف، بس كل مرة بتبهرني بإحساسها.

ساعات بحس إنها بتلاحظ حاجات فيا أنا نفسي مش بعرف أشرحها، وإنها بتقدر تحس بيا من غير ما أتكلم.

ومع كل الحب اللي ماما بتديهولي، فيه حلم نفسي أحققهولها من قلبي.

نفسي أحقق حلمها الوحيد، وأطلعها عمرة.

نفسي ييجي اليوم اللي أقدر فيه أعمل لها الحاجة دي، وأشوف فرحتها بعيني. زي ما هي طول عمرها عايزاني أحسن الناس، نفسي أنا كمان أكون سبب في فرحتها، وأقدر أعمل لها حاجة نفسها فيها.

مش عارفة إمتى الحلم ده هيتحقق، بس بدعي ربنا يقدرني عليه، وأشوف اليوم اللي أفرّح فيه قلبها.

لأن ماما مش مجرد فصل في حكايتي.

ماما جزء من كل فصل فيها.

الفصل الثالث: أختي… بنتي اللي مجبتهاش

أنا وأختي قريبين جدًا من بعض، بس ده مش معناه إننا ملايكة

 
(2)
Calvin

Calvin

 

 
(3)
Undergrowth -

Undergrowth -