quotes of books nabil abdul hamid
Nabil Abdul Hamid
شاعر مصري.
مهندس مدني من المنصورة.
مقيم حالياً بمدينة جدة بالمملكة العربية السعودية لظروف العمل ..
له ديوانين بالعاميّة ..
"قانون الدنيا الساخر" الصادر عن دار روعة للنشر و التوزيع في يناير 2014 ..
و"أهرام الجمعة" الصادر عن دار العلوم للنشر و التوزيع في يناير 2015
بقالي كتير
بحاول إني أتغيّر
و أقول بُكره ..
هكون أحسن من الأول
و مين يِكره ..
و مين محاولش ..
و عدى عليا مِيت بُكره
و أنا برضُه مابتغيّرش ...
بفكّر
بس مابقررش ...
لكن دلوقتي أنا ناوي
و عندي الوقت و الفِكرة ...
مقرر إني هتغيّر
و هبدأ ..
بس من بُكره ..
NoorBook
عزاء واجب
رايح يِكشِف
كان عيّان..
راح مطّمِن
جِه قلقان..
جالُه الدور
طَفَى النور
نام مِتكَدّر
مات زعلان..
كان بيفكّر بس يعيش..
ظَبَطْ الساعة وقَفَل الشيش..
شدّ لحافُه وغَطّى هُمومُه
نام ولحدْ الآن ماصحيش..
روحين
وقالولنا إننا روح بين جسدين..
وإننا واحد مقسوم نُصين..
وإننا فاهمين
عن بعض الظاهر والخافي
وإن اللي ما بيننا أكيد كافي
علشان الدُنيا ما تِجبِرناش
نمشي فـ طريقين..
وشِربنا الخِدعة وما فهمناش
غير بعد ما راح العُمر بلاش
غلطتنا إن احنا ما صدقناش
إن احنا اتنين..
لو مسافر
لو مِسافِر خلّي بالَك
خُد معاك كُل الحاجات ..
صُورَة ليها
و صُورَة ليهُم
صُورَة مِن كُل اللي فات ..
خُصلتين من شَعر أُختك
ويّا منديل من أبوك ..
طبطبة من قلب أُمَك
ريحة من برفان أخوك
بُكرة لمّا تِحِنّ يِمكِن
ييجي وقت وينفعوك
لما يبقى الباقي فيهم
بس حبة ذكريات
والحنين يقلق منامك
وسط غُربة ليلها كافِر
خُد معاك كُل الحاجات
خُدها ويّاك لو مِسافِر
يا شوارع زحمة الصبحية .. ويارزق يحب الخفيّة ..
أنا شامم ريحة طعمية .. ما تجيبو قًرصين
.
هنفضل تملّي بنشبه لبعض ..
تشابه أسامي وتشابه ظروف
بنبعد ونرجع نصفِّي اللي بيننا ..
ونُشبك بواقي النقط والحروف ..
بتركن عليّا وتسند كتافك ..
وأنا ف عز ليلي .. بعينك بشوف
تعكِّز عليّا .. وأعكِّز عليك
وتضحك ف وشي ..
برغم اللي فيك ..
نفضفض لروحنا .. نلصَّم جروحنا ..
وتستقوى بيّا .. وبستقوى بيك
.
يا أهلي وقرايبي .. وصُحبة زمان
يا ساكنين شارعنا وعِشرة مكان ..
يا كلِّ اللي شكلي .. وعايشين مشاكلي
زمايل مدارس، زمايل ميدان ..
بخاف ع اللي بينّا .. وأخاف ع اللي منَّا
وأخاف م المخبي
وشر اللي بعد
وبتمنى نفضل .. بنشبه لبعض!
Amr Alalfy 