books a poem about betrayal by hamid zayd
If you do not find what you're looking for, you can use more accurate words.
قصيدة عن الخيانة لحامد زيد (Info)
تخونين وتبين أرضى؟ واحد يرضى تخونينه
أنا لا جيت أخونك مع حبيبه ثانية ترضين
من أول ما رجعت من السفر ما شفت لك بينه
وأنا اللي كنت أحسبك قبل أدوس أرض المطار تجين
تكونين أنتِ أول شخص عيني تحتضن عينه
وكنت أتخيلك من زود فرحة رجعتي تبكين
وأشوف بدمعتك حكيك وأعرف قبل تحكينه
وأجيب أحلى من اللي بتحكينه وأتركك تحكين
تقولين: الوطن نور.. وأقول: بنور مضوينه
تقولي لي: غديت أحلى وأقول: عيونك الحلوين
كلام نام بشفاهك وخفتي لا تصحينه
ذخرتيه لغرام اللي ينام ويتركك تصحين
تغانمتي غيابي لين رجحتي موازينه
تعلم من يدك لمس الكفوف وعلمك تجفين
وليتك لاقية به شي فيني ما تلاقينه
مهو بغرور لكن خابرك مالك أمل تلقين
تغافلك بغلا وإلّا الحلا مهو بمن زينه
تزينه الصور بس الصحيح ابن الحلال زوين
وأنا ماني بناقص عنه يوم إنك تبدينه
نصيبي هو نصيبي لو يسددها من الصوبين
قنوع بمظهري والسم ما يذبح ثعابينه
على قول المثل ماني حلو لكني ماني شين
إذا أهداك الزهر مرة فأنا أهديتك بساتينه
وإذا ألهاك بفرح ليلة فأنا تهت لبكاك سنين
وإذا استضعفتك أملاكه وشتتك ملايينه
أنا حتى فتات الخبزة أقسمها معك نصين
طموحي، بس آجي وأظفر بشي تستحقينه
تدينته، تسلفته، سرقته، مو مهم منين
كأني من كثر ما أرضى بكل اللي تمنينه
لو إنك تطلبين الله يعنيني، بقول: آمــــين
أنا ما ألعب على الحبلين، وقت الطيش وسنينه
تبين الحين يوم إني كبرت ألعب على الحبلين
ترى عند الحضر بالذات عيب اللي تسوينه
حلاتك لا عشقتيني.. تعشقيني ليوم الدين
غرام نسكن ضلوعه حشيمه من مجانينه
جفا يجمع معزتنا ولا عشق يذل اثنين
كثار اللي تحدوني وقالوا لي: تحبينه
أمانة لا تخليني صغير بعينهم تكفـــــين
لأني كل ما قالوا تخون.. أقول: مسكينة
عليك الله وأمانة علميهم منهو المسكيـــن
أنا خايف لياطاح الجمل تكثر سكاكينه
وأنا ما عاد بضلوعي مكان لطعنة الســــكين
مثل ما قالوا: المكتوب واضح من عناوينه
لو ارحل منك للغربة باسافر من ظلامك وين
كفاية.. كل حلم يمر برقادي تزورينه
كفاية من تفارقنا وأنا ما غمضت لي عـــيــن
قبل يومين شفتك بالمنام وقمت من حينه
ونمت أمس ورجع نفس المنام اللي قبل يومين.
