مراجعات كتب لمياء عبد الفتاح
لمياء عبد الفتاح
غير متوفر وصف له.
لأجلك فقط
Esraa Dawood 22 فبراير 2021
-
•أسم الرواية: لأجلك فقط
•أسم الكاتبة: لمياء عبدالفتاح
•عدد الصفحات: 309
•قسم:أدب دراما رومانسي
•دار النشر: نبوغ للنشر والتوزيع
• رأيي في الرواية: الكاتبة أسلوب سردها كان بسيط جداً ومش متكلف، أحداث الرواية كانت رقيقة جداً وشبابية، بتديك طابع واجواء مسلسل حكايات بنات،يعني لو اتعملت مسلسل هيكون شائع جداً وهيعجب فئة كبيرة
لان حلاوة الرواية مكانتش في جمال الأحداث نفسها،بقدر ما كانت جميلة بسبب الرسايل الحياتية اللي الكاتبة كانت بتعرف تحطها بالمنتصف دايما، كانت بتعرف توظفها جدا وفي مكانها المناسب حسب كل مشهد
وحقيقي الرسايل دي كانت جوهر الرواية من وجهة نظري واحلى حاجة في الرواية كلها،لانها رسايل بتيجي كتطيب خاطر ومواساة من حيث انها كانت بتتضمن مواضيع اجتماعية وشبابية جداً زي الخيانة،الخذلان،التصالح مع النفس وقبول الأخطاء الخ..
• أقتباس من الرواية: "من الجيد أن لا ندخل في علاقة حب بغرض شيء آخر غير الحب وإلا ستكون النتيجة عكس توقعاتنا، وستنقلب الموازين ونصبح الشخص الذي يشفق عليه الآخرون وسنتأذی".
لأجلك فقط
رانيا خالد 29 مارس 2021
ريفيو النهاردة عن رواية لأجلكِ فقط واحدة من روايتي المفضلة، في الحقيقة أنا سمعت كتير جدًا عن الرواية لأن الرواية من قبل نزولها و هي عامله ضجة كبيرة و فعلاً الرواية تستاهل الضجة دي لأنها مش مجرد رواية هتقرأها و خلاص لا دي واحدة من الروايات اللي لما هتقرأها هتتعلم منها دروس عن العلاقات الاجتماعية و مش هتتعلم درس و لا أتنين لا دا حرفيًا كل حدث في الرواية ليه هدف و ليه حكمة من كتابته، حقيقي أنا استمتعت جدًا و استفدت أثناء القراءة، حبيت كل تفاصيل الرواية و اندمجت مع الشخصيات ضحكت و زعلت و فرحت معاهم الكاتبة قدرت توصل احساس الشخصيات كلها و خلتني أتأثر بيهم كلهم، و لكن محبتش أن الكاتبة عرفت بكل الشخصيات في بداية الرواية لأن دا خلاني اتلغبط لغاية ما حفظت الأسماء كنت افضل انها تعرف بيهم علي مراحل مختلفة، بالنسبة للسرد فهو كان ممتع و بسيط و لكن الحوار كان طويل شوية كنت أتمني لو السرد أطول لأني كنت مستمتعة بيه جدًا و لكن مع ذلك أنا استمتعت و استفدت جدًا بقراءة الرواية و حقيقي انصح الكل بقراءتها .
تقيمي للرواية 5/5 .
رواية: لأجلكِ فقط .
للكاتبة : لمياء عبد الفتاح.
دار : نبوغ للنشر و التوزيع
