كتب استعاردة الجراد
اذا لم تجد ما تبحث عنه يمكنك استخدام كلمات أكثر دقة.
استعاردة الجراد (كتاب)
اتلمّ حواليّا الجراد
وأَنَا بادخّن من سجايري الفرط
قاعد على الكرسي
وقدامي العشا
لما شافوه أكلوه
الأوضة مخنوقة
في كل حتة جرادة حتى طلعوا فوق بعضهم من كتمة الزحمة
وأنا مسلّم أمري
مش عارف اتحرك واقرّب من حبيبتي عشان
ماتخافش من شكل الجراد فوق لبسي
فرضيت بأمري وسيبتهم في الأوضة واتعودت على صوتهم
هما النهاردة
هيجيبوا أصحابهم
يمشوا على وشي
وهيجبروني اضحك
وهضحك
هيقولوا ما تعملش
مش هعمل
هيقولوا ما تحبش
ف هضرب قلبي
هيقولوا إحنا نجوّزك بنتنا
مش هرضى بيها ويعملوا اللي يعملوه
اسمع كلامي اللي اتكتب
على بحر واحد
من أوله لآخره
سيبه يعيّط في عينيك يا جرادة
خليه يكمّل نفسه مكعبات يا قبيح
وانت هتكره صوتك
هتكره نبرتك في كلامك
هتكره بس علشان إنت محتاج قلب تاكله
مش تحبه
إزاي وإنت بتقتل الفراشات تحب
إزاي وإنت بتخرب الأبيات تحب
إزاي وإنت مالكش غير المصلحة هتحب
بتخاف فتضحك
وتخاف فتضحك أسرع
لا يلمحوك بتعيط
وروحك دي مهما اتخيطت
ما خلاص
مهرية مش هتلاقي ترزي بإبرته يقدر يخيط
خليك بتجري في الكلام وبترمي كل الناس بطوب
هتلاقي في الآخر ماحدش يرضى
إنه يداوي جراد معطوب.
