كتاب حرية مسئولة

الرواية جميلة فكرتها حلوة ومهمة وهادفة ، وكمان خفيفة فيها كوميديا الموقف المضحكة. متزهقش وأنت بتقرأها، وتححسك إنك قاعد مع عيلتك تهزر وتضحك. واللغة مش معقدة وسهلة.
الرواية تصلح لجميع الأعمار ولمبتدئين القراءة.

رواية جميلة جداً ، كبيرة بس مترابطة وأحداثها تشد وفيها مزج ما بين الجد وخفة الدم . الكاتبة رائعة في السرد والتركيز على التفاصيل .. برافو

تدخل كارما منزلها وحجرتها بانفعال شديد وبكاء هستيري ، فالقيود المجتمعية على البنت أصبحت طوق يخنقها ولديها رغبة شديدة في كسر هذه القيود ، ومع حديثها اليوم مع خالد زاد الأمر سوءً ووصلت لهذه الحالة من البكاء الشديد .
شعرت ابتسام بها وسمعت بكائها ، فهرعت إلى حجرتها لتعرف سبب هذا البكاء ..
ابتسام : مالك يا كارما بتعيطي ليه ؟
كارما : أنا مش عارفة ليه مطلعتش ولد ؟
ابتسام : يا خراشي لو أنت ولد وبالجمال دة ، دة كل البنات كانوا انتحروا عشانك ههههههههه .
كارما : أنا مابهزرش يا مامي .. أنا زهقت .
ابتسام : ليه بس ؟
كارما : كوني بنت مقيدني في تصرفاتي وتحقيق طموحي وطريقة تعاملي مع الناس ، أنا بتعامل بفطرتي والناس عايزاني افكر قبل ما اتكلم وراجع نفسي أنا ولد ولا بنت قبل ما طلع الكلام من بوقي .
ابتسام : وأنت من امتى بيهمك كلام الناس ، أنا مش قايلالك ارميهم ورا ضهرك كدة كدة مابيبطلوش كلام .
كارما : والله بعمل كدة بس في مواقف بتبقأة غصب عنك .
ابتسام : ايوة ايه اللي حصل خلاكي في الحالة دي ؟
كارما : خالد كان بيقدم ال cv بتاعته في الامارات وهايقدم لأحمد ولما قلتله قدملي أنا كمان مرضيش عشان قال ايه مافيش بنت تسافر لوحدها .
( ابتسام صمت ونظرة طويلة لكارما )
كارما : ايه ؟ بتبصيلي ليه ؟! ولا أنت رأيك ايه؟!
ابتسام : وتسافري ليه أنت بتشتغلي هنا ، يعني عندك شغل ووسط أهلك تتغربي ليه ؟
كارما : اتغرب عشان عايزة أحقق طموحي .
ابتسام : وطموحك مش هايتحقق غير بالسفر ، ما تحققيه هنا .
كارما : ماما هو أنت مش من هنا ولا ايه ؟، أظن مش محتاجة اقولك حال البلد عامل ازاي ، ومش محتاجة اقولك ان اللي هاحققه هنا في 50 سنة ممكن لما اسافر احققه في 10 سنين بس .
ابتسام : طب ولو قولتلك ان فعلاً خالد معاه حق وماينفعش البنت تسافر لوحدها .
كارما (منفعلة): يبقأة أنت يا ماما زيهم ، متربنيش على حاجة ولما نقع في مشكلة يطلع تفكيرك زيهم ، مش هما دول الناس اللي موراهمش غير الرغي بينتقدوا الناس وهما مليانيين بلاوي واللي يخاف من كلامهم عمره ما ينجح .
ابتسام : كارما أهدي .
كارما : مش هاهدى ،أنا مش هاهدى أنا زهقت وجبت أخري من مجتمع كله ازدواجية معايير ، هوووف حاسة أني مش قادرة اتنفس .
ابتسام : حبيبتي أنا مش معترضة انك تسافري أنا معترضة انك تسافري لوحدك .
كارما : أهاااااا وصلنا للكلام اللي هاينرفزني أكتر وماينفعش الواحدة تسافر غير مع جوزها و.........
ابتسام : لأا مش لازم جوزها .. ممكن مامتها ؟
كارما : يعني ايه ؟
ابتسام : يعني أنا هاسافر معاكي أي حتة أنت تلاقي فيها شغل يحقق لك طموحك ، مينفعش اسيب القمر دة لوحده .
كارما : وشغلك وبيتك يا مامي ؟
ابتسام : ما أنت عشان مشغولة عني ومش فاكراني خالص ومشغولة بالشغل والكورسات والخروج مع اصحابك نسيتي أن عيد ميلادي كمان أسبوعين وخلاص هاطلع معاش .
#رواية #حرية_مسئولة

لا كلمات تعبر عن جمال الرواية وإحساسك بنفسك وأنت بتقرأ انك شخصية من شخصيات الرواية . جميلة بجد . شكراً الكاتبة نرمين يوسف